Да 80-годдзя Вялікай Перамогі пісьменнікі Магілёўшчыны праводзяць шэраг мерапрыемстваў.
Так, адбылася шчырая і даверлівая сустрэча вучняў 10-х і 11-х класаў сярэдняй школы № 28 імя Героя Савецкага Саюза Андрэя Мельнікава г. Магілёва з беларускім пісьменнікам Алесем Казекам, старшынёй Магілёўскага абласнога аддзялення Саюза пісьменнікаў Беларусі.
Чырвонай ніткай сустрэчы праходзіла тэма любові да Радзімы, неабходнасці зберажэння гістарычнай памяці і тэма генацыду савецкага народа падчас Вялікай Айчыннай вайны.
Алесь Казека распавядаў аб роднай зямлі, якая з’яўляецца жыватворнай крыніцай і натхненнем у яго творчасці. Вучні з непрытоенай увагай і зацікаўленасцю слухалі аўтара, натхняліся яго вершамі.
Падчас сустрэчы завязалася цікавая гутарка з паэтам, у якой старшакласнікамі былі ўзняты філасофскія пытанні існасці мэтаў чалавечага жыцця.
Алесь Казека на прыкладзе паэмы «Марыйка» расказаў аб пакутах беларускага народа пад нямецка-фашысцкімі акупантамі ў гады вайны і пра жудасны лёс беларускіх вёсак, спаленых фашыстамі.
Падчас прагляду відэазапісу пастаноўкі па паэме «Марыйка» ў вачах вучняў адбіваўся не толькі непраходзячы боль за трагічныя лёсы сваіх продкаў, якія трапілі ў пекла вайны, але і трывога і надзея. Надзея на тое, што гэтае зло больш ніколі-ніколі не вернецца на нашу зямлю.
Пісьменнік таксама наведаў школьны этнаграфічны музей. Экспанаты, прадстаўленыя ў музеі, адлюстроўваюць гаспадарчую дзейнасць, хатні побыт, абрадавую практыку, узоры мастацкай творчасці сялян Магілёўшчыны канца XIX – пачатку XX ст. Вельмі ўразіла Алеся Казеку афармленне музея, якое яскрава акунула яго ў далёкае вясковае дзяцінства, рэдкія рэлігійныя кнігі, выдадзеныя ў пачатку ХХ ст., люлька, вырабленая з кары ў 1922 годзе, старадаўнія жорны.
Напрыканцы сустрэчы адбылася невялікая аўтограф-сесія. Аўтар падпісаў свае кнігі, набытыя напярэдадні вучнямі і настаўнікамі ў кнігарнях Магілёва. Прысутныя шчыра падзякавалі Алесю Мікалаевічу за змястоўную, цікавую і пазнавальную сустрэчу.
